აკადემიკოს ევგენი ხარაძის იუბილე

მიმდინარე წლის 10 ოქტომბერს შესრულდა 20 წელი გამოჩენილი ქართველი მეცნიერის, სახელმწიფო და საზოგადო მოღვაწის, აკად. ე. ხარაძის გარდაცვალებიდან, ამავე წლის 31 ოქტომბერს კი 114 წელი მისი დაბადებიდან.

ევგენი ხარაძემ ღირსეულად დააგვირგვინა ქართველ ხალხში საუკუნეთა განმავლობაში არსებული ღრმა ინტერესი ციური მოვლენების შესწავლისადმი და ქართველ განმანათლებელთა მცდელობანი ასტრონომიული ცოდნის გასავრცელებლად. მეოცე საუკუნეში მისი ხელმძღვანელობით დაარსდა მსოფლიო მნიშვნელობის ასტრონომიული კვლევების კერა - მრავალდარგოვანი აბასთუმნის ასტროფიზიკური ობსერვატორია, რომელმაც დიდი წვლილი შეიტანა ვარსკვლავთა სპექტრების, ჩვენი გალაქტიკის აგებულებისა და თეორიული ასტროფიზიკის პრობლემათა კვლევაში. წლების განმავლობაში ხელმძღვანელობდა აღნიშნულ სამეცნიერო დარგებს საბჭოთა კავშირის მასშტაბით, რიგი წლების მანძილზე კი მთლიანად ასტრონომიის სფეროს საერთაშორისო ასტრონომიული კავშირის ვიცე-პრეზიდენტის რანგში.

მანვე დაარსა ასტრონომიის კათედრა თბილისის სახელმწიფო უნივერსიტეტში უმაღლესი ასტრონომიული განათლებისა და ასტრონომიულ კადრთა მომზადებისათვის. ობსერვატორიასაც და კათედრასაც იგი ხელმძღვანელობდა 6 ათეული წლის განმავლობაში. შექმნა უმაღლესი და საშუალო სკოლის მაღალი დონის სახელმძღვანელოთა ციკლი.

ევგენი ხარაძემ დიდი ღვაწლი დასდო ქართულ მეცნიერებასა და განათლებას - მრავალი წლის განმავლობაში იღვწოდა თბილისის სახელმწიფო უნივერსიტეტის რექტორის, ასევე საქართველოს მეცნიერებათა აკადემიის ვიცე-პრეზიდენტისა და პრეზიდენტის პოსტებზე. მნიშვნელოვანი წვლილი აქვს შეტანილი საგამომცემლო საქმეშიც.

ევგენი ხარაძემ თავისი მოღვაწეობით ქართველი ხალხის დიდი სიყვარული დაიმსახურა. მიღებული აქვს უამრავი უმაღლესი რანგის ჯილდო. მისი სახელი მიენიჭა მის მიერ დაარსებულ ობსერვატორიას.

შალვა საბაშვილი

უახლოეს მომავალში ობსერვატორიის თბილისის ოფისში საზეიმოდ გაიხსნება ევგენი ხარაძის სახელობის კაბინეტი.