მიხეილ ვაშაკიძის სახელობის ახალგაზრდა მეცნიერის ჯილდო 2024 ასტრონომიაში

ჯილდოს მინიჭების პირობები:

სსიპ - საქართველოს ევგენი ხარაძის ეროვნული ასტროფიზიკური ობსერვატორია (შემდეგში - „ობსერვატორია“) 2024 წლის 19 აპრილიდან აცხადებს კონკურსს ასტრონომიაში მიხეილ ვაშაკიძის სახელობის ახალგაზრდა მეცნიერის ჯილდოს (შემდეგში - „ჯილდო“) მოსაპოვებლად.

პირს ასტრონომიაში მიხეილ ვაშაკიძის სახელობის ახალგაზრდა მეცნიერის ჯილდო შესაძლებელია მიენიჭოს თუ:

ა) არის ასტრონომიის სფეროში საკონკურსოდ წარმოდგენილი მნიშვნელოვანი სამეცნიერო პუბლიკაციის ავტორი/თანაავტორი;

ბ) საკონკურსოდ წარმოდგენილი სამეცნიერო პუბლიკაცია შესრულებულია საქართველოს სამეცნიერო-კვლევით ან/და უმაღლეს საგანმანმანათლებლო დაწესებულებაში;

გ) საკონკურსოდ წარმოდგენილი პუბლიკაცია გამოქვეყნებულია საერთაშორისო სამეცნიერო გამოცემაში ან/და განცხადების წარმოდგენის დღის მდგომარეობით შესაბამისი გამოცემის მიერ დადასტურებულია ამ პუბლიკაციის გამოსაქვეყნებლად მიღება („accepted for publication“);

დ) საკონკურსოდ წარმოდგენილი პუბლიკაცია არ არის/იყო წარდგენილი ჯილდოს მოსაპოვებლად ობსერვატორიის მიერ გამოცხადებულ სხვა კონკურსში;

ე) საკონკურსოდ წარმოდგენილი პუბლიკაცია გამოქვეყნებულია პერიოდი: 01.01.2021 წ. – 01.11.2024 წ.;

ვ) მისი ასაკი, საკონკურსო განცხადების წარდგენის დღის მდგომარეობით, არ აღემატება 35 წელს;

ზ) არის საქართველოს მოქალაქე.

შენიშვნა: უპირატესობა მიენიჭება პირს, რომლის ავტორობით შექმნილი საკონკურსოდ წარმოდგენილი სამეცნიერო პუბლიკაცია გამოქვეყნებულია მაღალი იმპაქტ-ფაქტორის მქონე საერთაშორისო სამეცნიერო გამოცემაში, ხოლო თუ ასეთი პუბლიკაცია შექმნილია რამდენიმე ავტორის მონაწილეობით – დასტურდება ამ პირის მნიშვნელოვანი წვლილი ერთობლივად შექმნილ პუბლიკაციაში.

განცხადებების მიღება: 1 - 11 ნოემბერი (24:00 სთ), 2024 წელი

შენიშვნა: კანდიდატი ვალდებულია განცხადებაში ხარვეზი (ასეთის არსებობის შემთხვევაში) შეავსოს შესაბამისი მითითების მიღების შემდეგ, 24 საათის განმავლობაში.

განცხადებების განხილვა: 12 - 15 ნოემბერი, 2024 წელი

განცხადების მიღების ფორმა: ელექტრონულად, შემდეგ ელ-ფოსტაზე: info@abao.ge.

ფულადი ჯილდოს ოდენობა: 2 000 ლარი

ჯილდოს რაოდენობა: 1

ჯილდოს გაცემის ინტენსივობა: ერთჯერადი.

ჯილდოს გაცემის თარიღი: ნოემბერი, 2024 წელი.

საკონკურსო კომისია: ობსერვატორიის სამეცნიერო საბჭო

დაჯილდოვება: პირს, რომელიც მოიპოვებს ჯილდოს გადაეცემა ლაურეატის დიპლომი და შესაბამისი ფულადი ჯილდო, აგრეთვე, ინფორმაცია გამოქვეყნდება საჯაროდ, ობსერვატორიის ვებ-გვერდზე: www.abao.ge.

კონკურსში მონაწილეობისათვის წარსადგენი დოკუმენტაცია:

ა) განცხადება;

ბ) პუბლიკაცია (ელექტრონული ფორმით, ორიგინალი რედაქციით);

გ) საკონკურსოდ წარდგენილი პუბლიკაციის მოკლე აღწერა-დახასიათება, აგრეთვე, იმ განსაკუთრებული სამეცნიერო მნიშვნელობის/ღირებულების მითითება, რის გამოც კანდიდატი თვლის, რომ გამოკვეთილია მისი დაჯილდოვების საფუძველი;

დ) კანდიდატის ბიოგრაფია (CV);

ე) პირადობის მოწმობა/პასპორტი;

ვ) თანაავტორ(ებ)ის წერილობითი თანხმობა/მხარდაჭერა მასზედ, რომ პირმა ჯილდოს მოსაპოვებლად წარადგინოს საკონკურსო განცხადება ჯილდოს მოსაპოვებლად და გამარჯვების შემთხვევაში იყოს დაჯილდოებული (თანაავტორობით შესრულებული პუბლიკაციის საკონკურსოდ წარდგენის შემთხვევაში);

ზ) ანგარიშის ნომერი გახსნილი საქართველოს ბანკში.