სამწუხარო ინფორმაცია

გარდაიცვალა სსიპ - საქართველოს ევგენი ხარაძის ეროვნული ასტროფიზიკური ობსერვატორიის უხუცესი თანამშრომელი, ღვაწლმოსილი მეცნიერი, ბატონი გურამ სალუქვაძე.

გურამ ნიკოლოზის ძე სალუქვაძე 1954 წ. თბილისის სახელმწიფო უნივერსიტეტის დამთავრების შემდეგ უწყვეტად მუშაობდა აბასთუმნის ასტროფიზიკურ ობსერვატორიაში სხვადასხვა სამეცნიერო თანამდებობებზე. მისი კვლევები ძირითადად უკავშირდებოდა ტრაპეციის ტიპის ვარსკვლავთ ჯერად სისტემებსა და ვარსკვლავთ ასოციაციებს. მისი სადოქტორო ნაშრომის ხელმძღვანელი იყო გამოჩენილი ასტროფიზიკოსი ვიქტორ ამბარცუმიანი. მას გამოქვეყნებული აქვს 80-ზე მეტი პუბლიკაცია, მათ შორის ტრაპეციის ტიპის ვარსკვლავთ ჯერადი სისტემების კატალოგები და მონოგრაფია „ტრაპეციის ტიპის სისტემების კვლევა და ვარსკვლავთა ევოლუცია“. იგი ხელმძღვანელობდა ობსერვატორიაში 125-სმ ტელესკოპის აზტ-11-ის ინსტალირებას. იკვლევდა ტელესკოპის ოპტიკურ მახასიათებლებსა და აბასთუმნის ასტროკლიმატს. მას მონაწილეობა აქვს მიღებული მზის სრული დაბნელების ექსპედიციებში. ბატონი გურამის ხელმძღვანელობით გაიზარდა არაერთი ქართველი ასტრონომი. იგი იყო საქართველოს ასტრონომიული საზოგადოების თავმჯდომარე, ასევე, იყო სომხეთის ბიურაკანი ასტროფიზიკური ობსერვატორიის საერთაშორისო სამეცნიერო ჟურნალის „ასტროფიზიკის“ რედკოლეგიის წევრი. ბატონი გურამი 1971 წლიდან მრავალი წლის განმავლობაში იყო აბასთუმნის ასტროფიზიკური ობსერვატორიის დირექტორის მოადგილე.

ობსერვატორიის თანამშრომლები ვწუხვართ უფროსი მეგობრის, გულისხმიერი ადამიანისა და კოლეგისა დანაკლისის გამო.